Bydd cynllun teithio llesol newydd yn Johnstown yn ei gwneud hi’n haws i bobl gael mynediad at siopau a chyfleusterau’r pentref ar droed ac ar feic – gan leihau llygredd ac annog pobl i fod yn fwy egnïol.
Bydd y cynllun yn creu llwybr mwy diogel a mwy deniadol rhwng Rhodfa Melyd a’r Stryd Fawr fel rhan o’r gwaith o ailddatblygu hen safle babanod Ysgol yr Hafod.
Bydd cyrbiau isel a phalmentydd botymog newydd yn gwella mannau croesi ar gyfer pobl â phroblemau symudedd, defnyddwyr cadeiriau olwyn, teuluoedd â phramiau a phobl ag amhariad ar eu golwg.
Bydd ehangu’r llwybr hefyd yn creu cyswllt byr di-draffig i helpu beicwyr i gael mynediad at ffyrdd preswyl tawelach.
Dywedodd y Cynghorydd David A Bithell, Aelod Arweiniol Cyngor Wrecsam sy’n gyfrifol am leihau carbon: “Mae’r cynllun yn adlewyrchu ein hymrwymiad i greu strydoedd mwy diogel a mwy hygyrch fel rhan o’n rhaglen Teithio Llesol.
“Trwy greu cysylltiad mwy uniongyrchol rhwng y Stryd Fawr a Rhodfa Melyd, gobeithio y byddwn ni’n annog mwy o bobl i gerdded neu olwynio ar gyfer teithiau lleol byr – gan helpu i greu cymuned iachach, fwy egnïol.”
Ychwanegodd y Cynghorydd Terry Evans, Aelod Arweiniol yr Amgylchedd: “Mae hwn yn gynllun ardderchog a fydd, gobeithio, yn lleihau traffig a pharcio yn yr ardal, ac yn annog mwy o bobl i gerdded ac olwynio.
“Yn ogystal â gosod cyrbiau isel a phalmentydd botymog, mae’r troedffyrdd hefyd wedi cael eu trin i ymestyn eu hoes, ac rydyn ni’n gofyn i bobl osgoi parcio arnyn nhw i helpu i ddiogelu’r wyneb newydd.”
Mae’r gwaith yn cael ei ariannu gan Lywodraeth Cymru drwy’r Gronfa Teithio Llesol, a weinyddir gan Trafnidiaeth Cymru, a’r gobaith yw y bydd yn cael ei gwblhau erbyn yr haf.
Dywedodd y Cynghorydd Steve Joe Jones, cynghorydd lleol ar gyfer Johnstown: “Diolch i Gyngor Wrecsam am gyflawni’r gwaith hwn, ac i Lywodraeth Cymru am ariannu’r cynllun.
“Mae annog mwy o bobl i deithio’n llesol ar gyfer teithiau lleol byr yn bwysig iawn am resymau amgylcheddol ac iechyd, a bydd ein cymuned yn elwa.”
