Erthgyl Gwadd – Maethu Cymru Wrecsam
‘Gall sefydlogrwydd fod y trobwynt sy’n newid popeth i blentyn mewn gofal.’
Y tro cyntaf i blentyn chwerthin, siarad am eu diwrnod, gofyn am wylio ffilm; mae’r rhain yn eiliadau y gallai llawer eu cymryd yn ganiataol, ond i ofalwyr maeth yng Nghymru, maen nhw’n symbol o un peth – datblygiad.
Mae plant sydd wedi profi trawma yn aml yn datblygu ffyrdd o amddiffyn eu hunain. Gallai hyn gynnwys ymddygiad fel gorbryder, cau eu hunain yn emosiynol, ymatebion dwys neu anhawster o ran dilyn rheolau.
Mae arolwg cenedlaethol a gomisiynwyd gan Maethu Cymru wedi canfod bod tua 80% o’r gofalwyr a holwyd wedi cefnogi plant sy’n dangos ymddygiad fel hyn. Er bod yr heriau hyn yn gallu bod yn anodd, dywedodd hanner y gofalwyr maeth a holwyd hefyd eu bod nhw wedi sylwi ar ddatblygiad ystyrlon o fewn y chwe mis cyntaf.
Rhannodd gofalwyr maeth fod yr eiliadau arwyddocaol hyn yn aml yn digwydd o gwmpas eiliadau bach o gysylltiad, ond maen nhw’n cynrychioli mwy na hynny: i blant mewn gofal, mae’n golygu eu bod nhw wedi gwneud cynnydd, maen nhw wedi dechrau teimlo’n ddiogel, maen nhw wedi dechrau gwella, teimlo eu bod nhw’n cael eu caru a theimlo eu bod nhw’n cael eu cefnogi ar ôl trawma yn ystod plentyndod.
Ar ôl profiad, cefnogaeth ac arweiniad proffesiynol, dywedodd bron pob gofalwr (93%) eu bod nhw bellach yn hyderus wrth ymateb i ymddygiad sy’n gysylltiedig â thrawma.
Mae’r canfyddiadau’n cael eu rhyddhau cyn y Pythefnos Gofal Maeth, ymgyrch flynyddol fwyaf y DU i godi ymwybyddiaeth o faethu, sy’n cael ei chynnal bob mis Mai. Mae’r thema eleni, Dyma yw Maethu, yn taflu goleuni ar brofiadau gwirioneddol gofalwyr maeth a’r rôl hanfodol maen nhw’n ei chwarae wrth helpu plant i deimlo’n ddiogel.
Mae Lisa wedi bod yn ofalwr maeth gyda’i hawdurdod lleol yn Wrecsam ers dros bedair blynedd. Mae hi’n disgrifio maethu fel “y peth mwyaf gwerth chweil, arbennig, hollol amhrisiadwy y gallwch chi ei wneud.”
Mae hi’n egluro: “Roedden ni eisiau darparu a rhoi’r cariad sydd gennym ni i’r plant hyn, ac mae wedi bod yn hudolus – gweld eu hwynebau, eu gwylio nhw’n datblygu, a gweld yr hyder y gallan nhw ei ennill o gael eu caru a chael amgylchedd diogel.
“Mae maethu hefyd wedi cael effaith gadarnhaol iawn ar ein dau blentyn ein hunain. Maen nhw wedi datblygu cymaint o empathi a gofal, ac yn union fel fi a Kate, mae ganddyn nhw lawer iawn o gariad i’w roi. Mae wedi dod â ni i gyd yn agosach at ein gilydd fel teulu ac wedi dangos i ni pa mor bwerus y gall cartref sefydlog, cariadus fod.”
Dywedodd y Cynghorydd Rob Walsh, yr Aelod Arweiniol dros Wasanaethau Plant: “Rydyn ni’n falch iawn o’n Gofalwyr Maeth yn Wrecsam. Rydyn ni’n falch o glywed bod gofalwyr maeth yn cael mynediad at yr adnoddau sydd ar gael iddyn nhw, ac mae’r rhain yn cael effaith gadarnhaol ar y plant yn eu gofal wrth gefnogi materion cymhleth fel trawma yn ystod plentyndod.”
“Mae Maethu Cymru Wrecsam wedi ymrwymo i gefnogi gofalwyr maeth drwy uchafbwyntiau ac isafbwyntiau maethu, ac mae’r arolwg yn dangos pa mor bwysig a gwerthfawr yw’r gefnogaeth leol honno.”
Yn ystod Pythefnos Gofal Maeth eleni, gallwch gwrdd â Thîm Maethu Cymru Wrecsam a Gofalwyr Maeth yng Nghanolfan Adnoddau Cymunedol Acton, Wrecsam, LL12 7LB ar 20 Mai, 10am – 2pm.
I gael rhagor o wybodaeth am ddod yn ofalwr maeth yn Wrecsam, ewch i wefan Maethu Cymru Wrecsam.
