Mae gwaith Cyngor Wrecsam i ddiogelu, plannu a chynllunio ar gyfer coed ar draws y fwrdeistref sirol wedi’i amlygu fel enghraifft o arfer da mewn astudiaeth achos rheoli asedau newydd Cenedlaethau’r Dyfodol Cymru.
Mae’r astudiaeth achos yn edrych ar sut mae’r cyngor a Phartneriaeth Coedwig Wrecsam yn defnyddio tystiolaeth, gweithio mewn partneriaeth a sut mae buddsoddiad wedi’i dargedu yn gwella brigdwf a seilwaith gwyrdd i gymunedau.
Mae’n cyfeirio at gastanwydden bêr boblogaidd Wrecsam ym Mharc Acton, a gafodd ei phleidleisio’n Goeden y Flwyddyn y DU yn 2023, ac yn tynnu sylw at ymrwymiad ehangach y cyngor i goed a choetir ar draws y fwrdeistref sirol.
Trwy ei Strategaeth Coed a Choetiroedd, mae’r cyngor wedi ymrwymo i darged i sicrhau bod gan Wrecsam o leiaf 20% o frigdwf trefol. Mae’r astudiaeth achos hefyd yn tynnu sylw at Archwiliad Seilwaith Gwyrdd y cyngor, a edrychodd ar dir sy’n eiddo i’r cyngor i nodi lleoliadau addas ar gyfer plannu coed ac ardaloedd lle gellid creu gwell cysylltiadau cynefinoedd.
Mae Partneriaeth Coedwig Wrecsam yn dwyn ynghyd sefydliadau gan gynnwys Cyfoeth Naturiol Cymru, Coed Cadw, Cymdeithas Byd Natur Gogledd Cymru, Cadwch Gymru’n Daclus, Llais y Goedwig, Ymddiriedolaeth Dyfrdwy Cymru, AVOW a Phrifysgol Wrecsam, wedi’u cydlynu gan y cyngor.
Dywedodd y Cynghorydd Mark Pritchard, Arweinydd y Cyngor a hyrwyddwr Bioamrywiaeth ac Ecoleg, “Mae’r gydnabyddiaeth hon yn gymeradwyaeth gref o ymrwymiad Wrecsam i fioamrywiaeth, ecoleg a seilwaith gwyrdd.”
“Mae coed a choetir yn chwarae rhan hanfodol wrth greu cynefinoedd, cefnogi bywyd gwyllt a chysylltu mannau gwyrdd ar draws y fwrdeistref sirol. Trwy gymryd dull sy’n seiliedig ar dystiolaeth, gallwn sicrhau bod y gwaith hwn o fudd i’r cymunedau sydd ei angen fwyaf, tra’n diogelu a gwella natur ar gyfer cenedlaethau’r dyfodol.”
Y gaeaf diwethaf, plannodd Cyngor Wrecsam, gyda chefnogaeth Partneriaeth Coedwig Wrecsam, dros 9,000 o goed ar draws y fwrdeistref sirol. Gyda chefnogaeth cyllid gan Gronfa Coed Argyfwng Coed Cadw, Trees for Cities, Lleoedd Lleol ar gyfer Natur a’r Gronfa Ffyniant Gyffredin, canolbwyntiodd y rhaglen blannu ar ardaloedd blaenoriaeth gyda llai o frigdwf a Sgoriau Ecwiti Coed gwael.
Ychwanegodd y Cynghorydd Mark Pritchard, “Mae’n wych gweld gwaith Wrecsam yn cael ei gydnabod fel enghraifft o arfer da. Mae coed a mannau gwyrdd yn chwarae rôl mor bwysig wrth gefnogi natur, gwella ansawdd aer, lleihau’r perygl o lifogydd a chreu lleoedd iachach i’n cymunedau.”
“Mae gwaith Partneriaeth Coedwig Wrecsam yn dangos beth y gellir ei gyflawni pan fydd sefydliadau’n gweithio gyda’i gilydd, gan ddefnyddio tystiolaeth i sicrhau bod plannu coed yn digwydd lle bydd y budd mwyaf.”
Mae Cyngor Wrecsam wedi ennill statws Dinas Coed y Byd am dair blynedd yn olynol, dynodiad rhyngwladol sy’n gofyn am ymrwymiad amlwg i gynllunio, plannu, cynnal a chadw a dathlu’r goedwig drefol.
