Gyda mwy o dywydd heulog ar y ffordd, bydd llawer ohonoch chi’n tanio’ch gril barbeciw dibynadwy dros y dyddiau nesaf (os nad ydych chi eisoes wedi gwneud hynny).
Gall fod yn esgus perffaith i dreulio ychydig o amser o safon gydag anwyliaid. Coginio ar farbeciw, tra bod yr haul allan… gall fod yn llawer o hwyl.
Ond tra byddwch chi’n mwynhau’r haul a’r bwyd, mae’n bwysig peidio â gadael i’ch safonau ailgylchu ollwng, a pharhau i ailgylchu popeth y gallwch chi.
Dywedodd y Cynghorydd David A Bithell, y Dirprwy Arweinydd a’r Aelod Arweiniol dros yr Amgylchedd: “Trwy gydol yr haf, bydd pobl yn bwyta bwyd yn yr awyr agored yn amlach, ac rydyn ni’n gofyn i bawb wneud yn siŵr bod unrhyw becynnau neu wastraff bwyd yn dal i gael eu hailgylchu. Peidiwch â thrin eich bwyd na’i becyn yn wahanol yn eich barbeciw nesaf a chofiwch fod yna ddigon o bethau y gellir eu hailgylchu.”
Gyda hynny mewn golwg, dyma ychydig o syniadau a fydd yn ei gwneud hi’n haws i chi ailgylchu yn eich barbeciw nesaf.
Bwyd dros ben
I ddechrau, gellir ailgylchu’r holl fwyd heb ei fwyta. Awgrym da yw mynd â’ch cadi allan a rhoi unrhyw esgyrn i mewn wrth i chi fynd ymlaen. Mae’n gwneud glanhau wedyn yn llawer haws, gwnewch yn siŵr eich bod chi’n cadw’r caead ar gau pan nad ydych chi’n ei ddefnyddio i osgoi unrhyw bryfed bondigrybwyll.
Mae hefyd yn syniad da gwneud unrhyw waith paratoi cychwynnol wrth ymyl eich cadi bwyd – fel paratoi’ch salad neu lysiau. O wneud hynny gallwch chi ollwng unrhyw wastraff yn syth i mewn.
Os ydych chi wedi gwneud gormod, beth am storio’r bwyd yn barod i’w fwyta y diwrnod canlynol? Oerwch weddillion cyn gynted â phosibl (yn ddelfrydol o fewn dwy awr) ac yna eu storio yn yr oergell. Gwnewch yn siŵr eich bod yn bwyta unrhyw weddillion o fewn dau ddiwrnod, ac eithrio reis wedi’i goginio, y dylech ei fwyta o fewn un diwrnod i helpu i osgoi gwenwyn bwyd.
Awgrym: Ydych chi’n defnyddio sgiwerau pren ar gyfer eich cebabs neu falws melys? Efallai nad ydych chi’n gwybod y gallwch ailgylchu’r rhain fel gwastraff bwyd yn eich cadi, fel pob cyllell a fforc bren!
Ceisiwch gadw ar ben pa fwydydd y gellir eu hailgylchu
Rydyn ni’n gwybod y gall fod llawer i’w gofio, ond mae gwybod beth sy’n gallu mynd yn eich cadi bwyd yn ein helpu ni.
Mae rhai o’r pethau hyn yn cynnwys:
- Ffrwythau a llysiau – amrwd ac wedi’u coginio
- Pliciadau ffrwythau – o felon dŵr, orennau, afalau ac ati.
- Cig a physgod – amrwd ac wedi’u coginio
- Esgyrn a plisg wy
- Reis, pasta, grawnfwyd a nwdls
- Bara, cacennau, toesau a bisgedi
- Bagiau te a gwaddod coffi
- Caws, wyau ac iogwrt
- Ffa, cnau a hadau
- Bwyd heb ei fwyta o’ch plât
- Cyllell, ffyrc a llwyau pren
Cymerwch olwg ar hyn am fwy o wybodaeth.
Dysglau cig
P’un a ydych chi’n coginio i ddau berson neu 20 o bobl, gyda barbeciw mae yna lawer o ddysglau cig plastig fel arfer, a chofiwch, yn Wrecsam gellir ailgylchu pob dysgl cig blastig wrth ymyl y ffordd!
Gwnewch yn siŵr nad oes unrhyw weddillion bwyd arnynt pan fyddwch chi’n eu hailgylchu… mae hyn yn bwysig iawn. Nid yw’n cymryd hir – mae rinsio cyflym neu olchi mewn dŵr llestri wedi’i ddefnyddio fel arfer yn gwneud y tric – ac mae hyn yn golygu ei fod yn cael ei ailgylchu i mewn i gynnyrch o ansawdd llawer gwell.
Neilltuwch ardal ar gyfer eich poteli a’ch caniau wedi’u defnyddio
Tric da arall yw sefydlu lle gerllaw ar gyfer unrhyw boteli cwrw, poteli pop neu ganiau a ddefnyddir, fel y gallwch eu storio’n hawdd i’w hailgylchu pan fyddwch chi’n gorffen eich barbeciw.
Ceisiwch osod bocs neu fag siopa y gall pobl eu gosod ynddo. Yna gallwch fynd ag ef yn syth i’ch blychau ailgylchu pan fyddwch chi wedi gorffen. Dysgwch beth sy’n gweithio orau i chi.
Gwnewch baneri bach haf
Os ydych chi’n teimlo’n hynod greadigol, beth am roi cynnig ar wneud rhywfaint o faneri bach haf i ychwanegu rhywfaint o liw ychwanegol i’ch barbeciw?
Gallwch ddefnyddio unrhyw ddarnau diangen o ffabrig sydd gennych, neu hyd yn oed yn uwchgylchu eich hen ddillad.
Os nad ydych chi’n gwybod ble i ddechrau gyda hyn, mae yna rai canllawiau defnyddiol ar-lein, gan gynnwys hon o dudalen Good Food y BBC.
Gemau awyr agored
I ychwanegu ychydig o hwyl ychwanegol i’r teulu, fe allech chi logi pecynnau parti hwyl a gemau awyr agored gan Lend & Mend (wedi’i leoli yn Nhŷ Pawb). Y peth gwych am fenthyca o Lend & Mend yw bod y costau’n isel ac nad oes angen i chi dalu pris llawn am rywbeth na fydd ei angen arnoch yn aml iawn. Wedi’r cyfan, dylai dathliadau fod yn gyffrous, nid yn ddrud!
Pori’r catalog ar-lein a gweld beth sydd ar gael!
Ceisiwch osgoi barbeciw tafladwy
Rydyn ni’n gweld pam y gall y rhain apelio at rai pobl, ond maen nhw’n cyfrannu’n enfawr at y diwylliant taflu sy’n bygwth yr amgylchedd.
Mae cael barbeciw amldro yn llawer rhatach yn yr hirdymor. Gall barbeciw amldro bara sawl blwyddyn, a phan ddaw’r amser yn y pen draw i ffarwelio â’ch hen gril dibynadwy, gallwch ei ailgylchu fel metel sgrap yn unrhyw un o’r tair canolfan ailgylchu yn Wrecsam.
Cofiwch – os defnyddiwch chi farbeciw tafladwy, rhaid i chi wneud yn siŵr ei fod wedi’i oeri’n llawn a bod yr holl ludw wedi llosgi cyn ei roi yn y bin.
Dysgwch fwy am yr hyn y gellir ei ailgylchu ar ein gwefan.
2 ffordd hawdd o gael gafael ar ein leinin cadi bwyd am ddim – Newyddion Cyngor Wrecsam
