Mae’r grŵp lleol, Wrecsam sy’n Deall Dementia, bob amser yn chwilio am ffyrdd o rannu’r neges am Ddementia, codi ymwybyddiaeth a chynorthwyo’r sawl sy’n byw gyda’r clefyd, a’u gofalwyr.
Yn anffodus, collodd un aelod o’r grŵp ac artist lleol, Margaret Roberts, ei chwaer i ddementia, ond ysbrydolodd darganfyddiad siawns ymhlith eiddo ei chwaer brosiect sydd wedi dod â phobl â’r clefyd, ynghyd â gofalwyr a chefnogwyr, at ei gilydd.
Roedd chwaer Margaret hefyd yn arlunydd ac ymhlith ei phethau daeth o hyd i ganllaw i Dapestri Bayeaux – y brodwaith canoloesol sy’n croniclo’r digwyddiadau a arweiniodd at Frwydr Hastings. Ac felly… dechreuodd y prosiect.
Ymunodd Wrecsam sy’n Deall Dementia â Margaret fel rhan o’u grŵp celf wythnosol, cynhwysol, lle mae pobl sy’n byw gyda dementia a’u gofalwyr yn gallu cymryd rhan mewn celf, gyda chymorth ac offer wedi’i ddarparu, heb unrhyw gost.
Heriwyd y grŵp hwn, ynghyd â dau arall y mae Margaret yn gweithio gyda nhw, i ail-greu’r tapestri mewn celf gyda phob aelod o’r grŵp yn peintio o leiaf un adran.
Yn falch o’r gwaith ei hun a phawb a gymerodd ran, penderfynwyd y dylid arddangos y cynnyrch gorffenedig – camp fawr am rywbeth mor hir – a chynigiodd Castell y Waun ystafell, sydd bellach wedi’i llenwi gan y gwaith celf ac sy’n cael ei arddangos i unrhyw un fynd i’w weld.
Dywedodd y Cynghorydd Frank Hemmings, cydlynydd y prosiect: “Mae celf yn allfa profedig, iach i’r rhai sy’n byw gyda dementia ac rydym mor ffodus i gael Margaret Roberts fel rhan o’n grŵp. Aeth llawer o’i hamser i mewn i’r trefnu a rhoi’r cymorth angenrheidiol, ac rydym i gyd mor falch o’r canlyniadau.
“Mae’r gwaith celf wedi cael derbyniad da iawn ac mae disgwyl iddo gael ei arddangos yng Nghastell y Waun am y misoedd nesaf, felly byddwn yn annog cymaint o bobl â phosibl i ddod i’w weld ac i ledaenu’r gair am y cymorth sydd ar gael i’r rhai sy’n byw gyda dementia, yn ogystal â’u gofalwyr.”
Dywedodd y Cynghorydd Beverley Parry-Jones, yr aelod arweiniol dros ofal cymdeithasol oedolion: “Mae Wrecsam sy’n Deall Dementia yn grŵp pwysig iawn, sy’n gweithio i gynyddu ymwybyddiaeth o ddementia ac yn cynnig cymorth a chefnogaeth lle bo hynny’n bosibl. Maent hefyd yn gweithio gyda phobl a busnesau lleol fel rhan o Cyfeillion Dementia.
Mae Cyfaill Dementia yn rhywun sy’n dysgu mwy am ddementia a’r ffyrdd y maent yn gallu gwneud newidiadau bach yn eu cymunedau i leihau teimladau o ynysu sy’n cael eu teimlo mor aml gan y rhai sy’n byw gyda’r clefyd. Rwyf hefyd yn falch o ddweud bod Cyngor Wrecsam yn sefydliad Cyfeillion Dementia.”
Derbyniwch y newyddion a’r wybodaeth ddiweddaraf yn syth i’ch mewnflwch.
