Mae digwyddiad Heneiddio’n Dda yn Wrecsam wedi bod yn llwyddiant ar ôl dod â thrigolion, grwpiau cymunedol a sefydliadau cymorth at ei gilydd ar gyfer dathliad cadarnhaol o heneiddio’n dda yn Wrecsam.
Cynhaliwyd y digwyddiad yn Nhŷ Pawb ar 12 Chwefror a chroesawodd ystod eang o sefydliadau sy’n cynnig cyngor, gwybodaeth a chymorth sy’n addas i bobl hŷn, oedolion, teuluoedd a gofalwyr.
Daeth dros 40 o sefydliadau i’r digwyddiad, gan gynnwys Tîm Seiberdroseddau Heddlu Gogledd Cymru, AVOW, The Rainbow Foundation a Chyngor ar Bopeth.
Rhoddodd y digwyddiad gyfle i bobl gwrdd â grwpiau lleol, dysgu am y cymorth sydd ar gael ledled Wrecsam, mwynhau sgyrsiau hamddenol, a dysgu mwy am y gwaith sy’n cael ei gyflawni fel rhan o daith Heneiddio’n Dda Wrecsam.
Mynychodd Rhian Bowen-Davies, Comisiynydd Pobl Hŷn Cymru, y digwyddiad a chanmolodd y gwaith sy’n digwydd yn lleol i gefnogi pobl i gadw’n egnïol, yn gysylltiedig ac yn rhan o’u cymunedau.
Yn dilyn y digwyddiad, dywedodd Rhian Bowen-Davies “Dylai pawb deimlo’n hynod falch o’r digwyddiad Heneiddio’n Dda. Roedd yn ddathliad gwych gydag ystod mor amrywiol o sefydliadau a grwpiau cymunedol yn dod at ei gilydd i gysylltu, cydweithio ac arddangos y gwaith gwych sy’n digwydd yn lleol.”
“Roedd yn wych gweld cymaint o bobl hŷn yn cymryd rhan mewn sgyrsiau, gan ddysgu am y cyfleoedd, y gweithgareddau a’r gefnogaeth sydd ar gael i’w helpu i fyw a heneiddio’n dda. Rwy’n wirioneddol ddiolchgar am y cyfle i fod yn rhan ohono ac i gwrdd â chymaint o bobl ysbrydoledig.”
Ymwelodd Rhian Bowen-Davies hefyd â Hwb Lles Wrecsam yn ystod ei hamser yn y ddinas, lle cyfarfu â staff, gwirfoddolwyr a phobl sy’n defnyddio’r gwasanaeth.
Mewn llythyr personol yn dilyn yr ymweliad, diolchodd i un gwirfoddolwr am rannu ei brofiadau a chanmolodd ei ymrwymiad i wirfoddoli a’r cyfraniad y mae’n ei wneud fel rhan o dîm yr Hwb Lles.
Dywedodd bod ei gynnydd, ei agwedd gadarnhaol a’i effaith i gyd yn bethau i fod yn falch ohonynt a chydnabu yr hyder yr oedd wedi’i fagu dros amser.
Dywedodd y Cynghorydd John Pritchard, yr Aelod Arweiniol dros Ofal Cymdeithasol i Oedolion, Iechyd a Lles “Mae llwyddiant y digwyddiad Heneiddio’n Dda yn dangos cryfder gweithio mewn partneriaeth yn Wrecsam. Roedd yn wych gweld cymaint o sefydliadau yn dod at ei gilydd mewn un lle i gynnig cyngor, cefnogaeth a chyfleoedd i bobl gadw mewn cysylltiad a byw’n annibynnol.”
“Mae Heneiddio’n Dda yn ymwneud â mwy na gwasanaethau – mae’n ymwneud â chymuned, hyder, cyfeillgarwch a gwneud yn siŵr bod pobl yn gwybod ble i droi pan fydd angen cymorth arnynt.”
Mae Wrecsam nawr wedi cyflawni statws Cymuned sy’n Gyfeillgar i Oedran Sefydliad Iechyd y Byd (WHO) yn swyddogol o 2026 ymlaen.
Mae rhagor o wybodaeth am Heneiddio’n Dda yn Wrecsam ar gael ar wefan Cyngor Wrecsam.
