Mae lleoliadau yn Wrecsam wedi dod at ei gilydd i addo eu cefnogaeth i Siarter Diogelwch Menywod yn y Nos Gogledd Cymru, gan ddangos ymrwymiad ar y cyd i helpu i wneud economi’r nos yn y ddinas yn fwy diogel, croesawgar a chefnogol i fenywod.
XS Wrexham a Penny Black oedd y lleoliadau cyntaf i lofnodi’r addewid, gan arwain y ffordd i eraill eu dilyn.
Daeth y lleoliadau at ei gilydd yn Tŷ Pawb i lofnodi’r siarter gyda’i gilydd, gan nodi cam cadarnhaol ymlaen i ddiogelwch menywod yn Wrecsam.
Llofnododd nifer o fusnesau lleol eraill yr addewid ar y diwrnod, gan gynnwys The Bank, The Welch Fusilier, New York New York, Gwesty’r Wynnstay Arms, The Long Pull, The Golden Lion, Chequers Wine Bar a Wrexham Cwtch.
Mae’r siarter, a lansiwyd yn gynharach eleni yn Tŷ Pawb, wedi’i datblygu i gefnogi busnesau a sefydliadau sy’n gweithredu yn ystod economi’r nos, yn enwedig y rhai sydd â staff, cwsmeriaid ac ymwelwyr benywaidd.
Mae’n annog lleoliadau i gymryd camau ymarferol i wella diogelwch menywod rhwng 6pm a 6am, gan gynnwys penodi Hyrwyddwr Diogelwch, cefnogi hyfforddiant staff, gwella llwybrau adrodd, hyrwyddo ymagwedd dim goddefgarwch tuag at aflonyddu ac adolygu dyluniad lleoliadau i helpu i leihau risg.
Trwy lofnodi’r siarter, mae lleoliadau’n dangos eu bod yn cymryd diogelwch menywod o ddifrif ac yn barod i chwarae rhan weithredol wrth greu mannau mwy diogel i staff, cwsmeriaid a’r cyhoedd ehangach.
Dywedodd y Cynghorydd Beverley Parry-Jones, Hyrwyddwr materion sy’n ymwneud â Thrais ar sail Rhywedd, Cam-drin Domestig a Thrais Rhywiol, “Mae’r Siarter yn ymwneud â gweithio gyda’n gilydd, cymryd camau ymarferol a sicrhau bod menywod yn teimlo’n fwy diogel ac wedi’u cefnogi pan fyddan nhw’n gweithio yn ein dinas neu’n ymweld â’n dinas gyda’r nos.”
“Mae XS Wrecsam a Penny Black wedi helpu i arwain y ffordd trwy ddod y lleoliadau cyntaf i lofnodi’r Siarter, ac mae’n galonogol iawn gweld busnesau eraill yn dod at ei gilydd i ddangos eu cefnogaeth a’u hymrwymiad i ddiogelwch menywod.”
Mae’r siarter wedi’i chynllunio i fod yn ymarferol ac yn gyraeddadwy, gan roi camau clir i fusnesau y gallant eu cymryd i gefnogi diogelwch menywod yn economi’r nos.
Mae busnesau sy’n llofnodi’r Siarter yn addo cefnogi nifer o ymrwymiadau allweddol, gan gynnwys penodi Hyrwyddwr, cyfathrebu negeseuon diogelwch cadarnhaol, grymuso staff, cefnogi’r cyhoedd, gwella hyfforddiant ac ymateb, ac adolygu dyluniad a diogelwch yn eu lleoliadau.
Y gobaith nawr yw y bydd mwy o leoliadau ar draws Wrecsam a’r rhanbarth ehangach yn dod ymlaen ac yn addo eu cefnogaeth.
Gall busnesau a sefydliadau sydd â diddordeb mewn cael rhagor o wybodaeth am Siarter Diogelwch Menywod yn y Nos Gogledd Cymru gysylltu â communitysafety@wrexham.gov.uk.
