Mynychodd Maer Wrecsam ddigwyddiad sgrinio canser y prostad PSA am ddim yn Hotel Wrexham, gan dynnu sylw at bwysigrwydd canfod yn gynnar a chefnogi gwaith rhagorol Grŵp Cymorth Canser y Prostad Wrecsam.
Mynychodd tua 70 o ddynion y diwrnod sgrinio. Er bod y mwyafrif helaeth wedi derbyn canlyniadau calonogol, cynghorwyd wyth person i gysylltu â’u meddyg teulu am brawf dilynol ar ôl derbyn darlleniad PSA uwch. Pwysleisiodd y trefnwyr y gall nifer o ffactorau effeithio ar lefelau PSA dros dro, sy’n golygu nad yw canlyniad uwch o reidrwydd yn dangos canser y prostad. Fodd bynnag, mae profion dilynol yn hanfodol i ddileu unrhyw bryderon.
Atgyfnerthodd y digwyddiad neges hanfodol: pan fydd canser y prostad yn cael ei ganfod yn gynnar, mae tua 92% o gleifion â PSA uchel sydd angen triniaeth yn ymateb yn llwyddiannus i’r driniaeth honno. Mae hyn yn dangos pam mae dynion, yn enwedig y rhai sydd â hanes teuluol o ganser y prostad, yn cael eu hannog yn gryf i fanteisio ar gyfleoedd sgrinio.
Rhoddodd y Maer ganmoliaeth i Grŵp Cymorth Canser y Prostad Wrecsam am drefnu’r digwyddiad ac am y cymorth amhrisiadwy maent yn ei ddarparu i ddynion lleol a’u teuluoedd.
“Mae ymroddiad y grŵp hwn yn gwneud gwahaniaeth gwirioneddol yn ein cymuned. Gall digwyddiadau fel hyn helpu i nodi problemau posibl yn gynnar, gan roi’r cyfle gorau posibl i bobl gael triniaeth lwyddiannus. Byddwn yn annog unrhyw un sy’n gymwys i ystyried cael eu profi.”
Gyda thua 140 o aelodau, Grŵp Cymorth Canser y Prostad Wrecsam yw’r mwyaf o’i fath yn y DU ac mae’n cael ei gydnabod fel y grŵp cymorth mwyaf llwyddiannus yng Nghymru.
Nid yw’r grŵp yn cyfarfod yn ystod mis Awst ond bydd yn ailddechrau cyfarfodydd ar y dydd Mercher cyntaf ym mis Medi, ac ar ddydd Mercher cyntaf pob mis wedi hynny, am 7.00pm yn Hotel Wrexham.
Am ragor o wybodaeth am y grŵp, cysylltwch â’r Ysgrifennydd Phil Jones ar 07525 824679.
Phil Jones a Mal Williams, sy’n byw ym Merffordd, fu’r ysgogiad y tu ôl i lwyddiant parhaus ac ymrwymiad y grŵp i godi ymwybyddiaeth o ganser y prostad ar draws ardal Wrecsam.
