Mae Wrecsam yn falch o nodi Wythnos Gofalwyr 2026 drwy gynnal digwyddiad cymunedol arbennig yn yr Hwb Lles ddydd Mercher 10 Mehefin, rhwng 10am a 12pm. Nod y digwyddiad yw cydnabod cyfraniad hanfodol gofalwyr di-dâl ledled yr ardal a sicrhau bod ganddynt fynediad at y gefnogaeth, y wybodaeth a’r gwasanaethau sydd eu hangen arnynt.
Mae Wythnos Gofalwyr yn ymgyrch genedlaethol sy’n tynnu sylw at yr heriau y mae gofalwyr di-dâl yn eu hwynebu ac yn cydnabod yr effaith enfawr y maent yn ei chael ar deuluoedd, cymunedau, a’r system iechyd a gofal cymdeithasol ehangach. Mae’r thema eleni yn canolbwyntio ar wneud gofalwyr yn ganolog i’n cymunedau, gan sicrhau eu bod yn teimlo eu bod yn cael eu gweld, eu gwerthfawrogi a’u cefnogi.
Bydd digwyddiad yr Hwb Lles yn dod ag ystod eang o sefydliadau lleol sy’n cynnig cyngor, arweiniad a chymorth ymarferol ynghyd. Bydd stondinau gwybodaeth yn cynnwys:
- Hosbis Tŷ’r Eos
- Gwasanaeth Gwybodaeth Gofalwyr Gogledd-ddwyrain Cymru
- Cymru Gynnes
- Groundwork
- Adferiad
- Gwasanaeth Gwybodaeth i Deuluoedd Wrecsam
- Tîm Taliadau Uniongyrchol
- … a sawl partner cymunedol arall
Bydd ymwelwyr yn cael cyfle i siarad yn uniongyrchol â gweithwyr proffesiynol, dysgu am y gwasanaethau sydd ar gael, ac archwilio opsiynau cymorth wedi’u teilwra i ofalwyr o bob oedran ac amgylchiadau.
Cynghorydd John Pritchard, Aelod Arweiniol dros Ofal Cymdeithasol i Oedolion: “Mae gofalwyr di-dâl yn chwarae rhan hanfodol yn ein cymunedau, yn aml yn cydbwyso cyfrifoldebau sylweddol heb lawer o gydnabyddiaeth. Mae Wythnos Gofalwyr yn rhoi cyfle i ni ddathlu eu hymroddiad a sicrhau eu bod yn gwybod bod cymorth ar gael.
“Rydym yn annog unrhyw un sy’n darparu gofal, boed ar gyfer aelod o’r teulu, ffrind, neu gymydog i ddod draw, cysylltu â gwasanaethau lleol, a darganfod pa help sydd ar gael.”
M️ae’r digwyddiad am ddim a does dim angen cadw lle. I gael rhagor o wybodaeth cysylltwch â: commissioning@wrexham.gov.uk
Rhoi llais i iechyd meddwl: yr awdur Amelea yn rhannu ei cherdd bwerus – Newyddion Cyngor Wrecsam
Derbyniwch y newyddion a’r wybodaeth ddiweddaraf yn syth i’ch mewnflwch.
