Cyflwynodd Llywodraeth Cymru derfyn cyflymder diofyn o 20mya ar ffyrdd cyfyngedig ledled Cymru ar 17 Medi 2023.
Gweithredodd Cyngor Wrecsam hyn yn llwyddiannus gyda dim ond nifer fach o ffyrdd 30mya yn cael eu pennu fel rhai eithriedig.
Ym mis Ebrill 2024, cyhoeddodd Llywodraeth Cymru adolygiad o’r cynllun 20mya.
Yn dilyn ymgysylltu helaeth ag Aelodau ac ymgynghori cyhoeddus, cyflwynwyd rhestr o 52 rhan o briffordd a oedd yn bodloni meini prawf Llywodraeth Cymru ar gyfer dychwelyd i 30mya i’r Bwrdd Gweithredol ym mis Chwefror 2025 – cymeradwyodd y Bwrdd Gweithredol y rhestr yn llawn.
Ers hynny mae Cyngor Wrecsam wedi gwneud cais llwyddiannus am arian gan Lywodraeth Cymru ac wedi derbyn swm o £400,000. Mae hyn yn ddigon i gwmpasu’r gwaith arwyddion i sicrhau cydymffurfiaeth lawn yn unol â’r Gorchmynion Rheoleiddio Traffig cyfreithiol, yn ogystal ag ychydig o fân waith ar y priffyrdd i wella diogelwch – mae contractwr wedi’i benodi.
Bydd gwaith ar adfer yr arwyddion yn dechrau ym mis Mai a rhagwelir y bydd pob un o’r 52 rhan o briffordd yn dychwelyd i 30mya erbyn diwedd mis Mehefin.
Dywedodd yr Aelod Arweiniol dros Drafnidiaeth Strategol, y Cynghorydd David A Bithell: “Ar ôl derbyn canlyniadau’r ymgynghoriad cyhoeddus, roedd yn amlwg nad oedd y mwyafrif yn hapus â llawer o ffyrdd 20mya newydd a’r effeithiau yr oeddent yn eu cael. “Rydym wedi gwrando, ystyried y dystiolaeth ac, o ganlyniad, rydym yn newid 52 rhan o briffordd yn ôl – wedi’i ariannu nid trwy ddulliau lleol ond trwy arian gan Lywodraeth Cymru. “Ni yw’r awdurdod cyntaf yng Nghymru i ddechrau’r broses o newid ffyrdd yn ôl.
“Wrth i’r newidiadau i arwyddion gael eu gweithredu, cynghorir bod gyrwyr yn cadw at yr uchafswm terfyn cyflymder sydd wedi’i arwyddo a gyrru yn ôl amodau’r ffordd. “Ni fydd Parthau 20mya sy’n bodoli eisoes, fel y rhai o amgylch ysgolion, yn newid ac nid oes unrhyw esgus ar gyfer goryrru yn yr ardaloedd hyn”
Mae’r rhestr a gymeradwywyd gan y Bwrdd Gweithredol ar gyfer dychwelyd i 30mya isod. Sylwch fod y GRhT cyfreithiol yn cwmpasu 52 rhan o briffordd. Mae rhai rhannau o briffordd ar yr un ‘ffordd’ sy’n esbonio pam nad oes 52 o enwau ar y rhestr isod.
B5445 Allt Merffordd, Merffordd
B5445 Ffordd Caer, Gresffordd
A5152 Ffordd Caer, Acton (A483 – Garden Village)
A5152 Ffordd Caer, Acton (Garden Village – Dinas)
Lôn Tŷ Gwyn, Acton
B5100 Lôn Rhosnesni, Acton
Ffordd Jeffreys, Borras
A534 Ffordd Holt, Wrecsam (Lôn Hullah i Greyhound)
A534 Ffordd Holt, Borras (Greyhound i’r ffordd gyswllt)
A525 Ffordd Rhuthun, Wrecsam
A541 Ffordd yr Wyddgrug, Gwersyllt
