Awdur: Chris

Prosiect newydd yn helpu i ddechrau bywydau pobl ifanc
Mae menter newydd i helpu pobl ifanc ddatblygu hyder a dysgu sgiliau bywyd pwysig newydd gael ei lansio yn Wrecsam.
Mae Prosiect Kickstart yn anelu i gefnogi pobl ifanc 16 oed a hŷn sydd ag amgylchiadau neu anghenion cymhleth – bydd yn eu helpu nhw i ddysgu sgiliau ymarferol a chymdeithasol, datblygu eu haddysg, dod o hyd i waith a byw bywydau mwy annibynnol.
Bydd llawer o bobl ifanc sy’n gadael gofal neu sydd mewn perygl o ddigartrefedd yn elwa o’r prosiect, ac mae’n cael ei gyflwyno gan Gyngor Wrecsam, Castell Ventures a Chymdeithas Tai Wales & West.
Bydd y cynllun yn cynnig gwahanol lefelau o gefnogaeth, yn amrywio o lety dan oruchwyliaeth 24/7 i’r rhai sydd angen llawer o help i ddechrau, i gefnogaeth lai dwys i’r rhai sydd wedi cymryd camau breision at fyw’n annibynnol.
Ydych chi’n ddioddefwr siarc benthyg arian? Ffoniwch 0300 123 311.
Meddai’r Cynghorydd Rob Walsh, Aelod Arweiniol y Gwasanaethau Plant: “Pan fyddwch chi’n dod yn oedolyn, cymerir yn ganiataol bod yn rhaid i chi sefyll ar eich traed eich hunain a gwneud penderfyniadau priodol ynghylch materion fel arian a dod o hyd i waith.
“Fodd bynnag, i lawer o bobl, yn enwedig oedolion ifanc ag anghenion cymhleth neu sy’n wynebu amgylchiadau heriol – e.e. heb deulu i’w cefnogi nhw – gall fod yn gyfnod aruthrol o anodd.
“Drwy ddarparu’r gefnogaeth gywir gallwn fagu eu hyder a’u rhoi ar ben y ffordd i ddod yn oedolion cryf ac annibynnol.
“Bydd prosiect Kickstart yn gwneud gwahaniaeth mawr i fywydau llawer o bobl ifanc, a dim ond un enghraifft ydi hon o sut mae Cyngor Bwrdeistref Sirol Wrecsam yn gweithio tu ôl i’r llenni yn cefnogi pobl ifanc leol.”
O ran costau byw, gallai gwneud yn siwr eich bod yn hawlio yr holl gymorth a chefnogaeth y mae gennych hawl iddo wneud gwahaniaeth mawr.

[button color=”” size=”large” type=”square_outlined” target=”new” link=”https://www.wrecsam.gov.uk/services/cymorth-gyda-chostau-byw”] HAWLIWCH YR HYN SY’N DDYLEDUS I CHI [/button]
Ionawr 4, 2023
Staff y Cyngor yn cefnogi ffoaduriaid o Wcráin y Nadolig yma
Mae gweithwyr Cyngor Wrecsam wedi cynnal digwyddiad arbennig i Wcrainiad sy’n aros yn y fwrdeistref sirol.
Estynnodd staff yr Adran Dai wahoddiad i westeion o Wcráin fwynhau paned, cacen a bisgedi yn swyddfeydd y Cyngor ar Ffordd Rhuthun, fel rhan o’r ymdrechion parhaus i estyn croeso i ffoaduriaid a’u helpu nhw i deimlo’n ddiogel.
Helpodd staff yr Adran Dai i baratoi lluniaeth ac roedd yr ystafell yn llawn chwerthin a chyfeillgarwch.
Meddai’r Cyng. David A Bithell, Dirprwy Arweinydd y Cyngor ac Aelod Arweiniol Tai, a helpodd i drefnu’r digwyddiad:
“Roedd yn fore braf ac aeth ein staff gam ymhellach i groesawu ein gwesteion.
“Mae’r rhyfel yn Wcráin wedi gorfodi llawer o bobl o’u cartrefi, ac mae’n bwysig ein bod ni’n parhau i gefnogi ac estyn croeso i’r rheiny sy’n aros yn y fwrdeistref sirol a gwneud iddynt deimlo’n saff.
“Rydw i’n falch iawn o’n staff – fe wnaethon nhw waith penigamp ac roeddech chi’n gallu teimlo’r cynhesrwydd a’r cyfeillgarwch rhwng pawb.”
Ydych chi’n ddioddefwr siarc benthyg arian? Ffoniwch 0300 123 311.
Daeth llawer o weithwyr eraill y Cyngor i’r digwyddiad sy’n helpu teuluoedd o Wcráin, yn ogystal ag Arweinydd y cyngor, y Cyng. Mark Pritchard, a Thîm Datblygu Cymunedol CCPD Wrecsam.
Meddai’r Cyng. Pritchard:
“Bydd hwn yn Nadolig anodd iawn i lawer o bobl y mae eu bywydau wedi’u troi ben i waered oherwydd y rhyfel, ac mae arnom ni angen gwneud popeth o fewn ein gallu i estyn croeso iddyn nhw a gwneud iddyn nhw deimlo’n saff.
“Mae Wrecsam wastad wedi bod yn gymuned gyfeillgar a charedig, ac roedd yn braf gweld ein gwesteion yn mwynhau paned, cacen a sgyrsiau cyfeillgar gyda’n staff. Roedd yn ddigwyddiad braf iawn.”
O ran costau byw, gallai gwneud yn siwr eich bod yn hawlio yr holl gymorth a chefnogaeth y mae gennych hawl iddo wneud gwahaniaeth mawr.

[button color=”” size=”large” type=”square_outlined” target=”new” link=”https://www.wrecsam.gov.uk/services/cymorth-gyda-chostau-byw”] HAWLIWCH YR HYN SY’N DDYLEDUS I CHI [/button]
Rhagfyr 20, 2022
DIWEDDARIAD: Mwy o luniau a fideos o ymweliad Y Brenin a’r Frenhines Gydweddog â Wrecsam
Bydd dydd Gwener, 9 Rhagfyr (2022), yn cael ei gofio fel diwrnod gwirioneddol hanesyddol i Wrecsam. Bydd y diwrnod hwn yn aros yn y cof am hir iawn!
Dyma’r diwrnod yr ymwelodd Eu Mawrhydi y Brenin a’r Frenhines Gydweddog â dinas fwyaf newydd Cymru, gan greu cyffro mawr ledled y fwrdeistref sirol.
Dechreuodd y diwrnod gydag ymweliad â’r Cae Ras i ymweld â Chlwb Pêl-droed Wrecsam, lle cyfarfu Eu Mawrhydi â’r perchnogion, Ryan Reynolds a Rob McElhenney, yn ogystal â chwaraewyr a staff.
Dilynwyd hyn gan wasanaeth yn Eglwys San Silyn i nodi bod Wrecsam wedi ei gwneud yn ddinas, a gorffennwyd y diwrnod gyda phlannu coeden ar gyfer Canopi Gwyrdd y Frenhines ar ystad syfrdanol yr Ymddiriedolaeth Genedlaethol yn Erddig.
Edrychwch ar y lluniau anhygoel hyn…
Mae angen JavaScript ar y sioe sleidiau hon.
Dywedodd Maer Wrecsam, y Cynghorydd Brian Cameron: “Am ddiwrnod ardderchog i ddinas fwyaf newydd Cymru!
“Mae hwn yn gyfnod cyffrous, ac yr oedd yn fraint aruthrol cael croesawu Eu Mawrhydi y Brenin a’r Frenhines Gydweddog i’r fwrdeistref sirol.”
Dywedodd y Cynghorydd Mark Pritchard, Arweinydd y Cyngor: “Mae bwrlwm cadarnhaol enfawr o gwmpas dinas Wrecsam ar hyn o bryd.
“Mae gennym Safle Treftadaeth y Byd, clwb pêl-droed anhygoel, ac mae pobl o bedwar ban byd yn dechrau clywed amdanom ni, ac yn ymweld â Wrecsam.
“Rwy’n eithriadol o falch o stori Wrecsam, ac mae cael ymweliad gan Eu Mawrhydi yn ardderchog ac yn destun balchder mawr i mi.”
Dywedodd Ian Bancroft, Prif Weithredwr Cyngor Wrecsam: “Roedd hwn yn ddiwrnod gwirioneddol hanesyddol i’r fwrdeistref sirol.
“Mae Wrecsam yn codi’r bar ac yn dangos ei photensial anhygoel i’r byd; ac mae gallu croesawu Eu Mawrhydi i ddathlu ein statws dinas yn ffordd briodol o ddiweddu blwyddyn arbennig i Wrecsam.”
Rhagfyr 9, 2022
Sicrhewch eich bod yn gwybod beth yw Symptomau Strep A a’r dwymyn goch
Gwres uchel, dolur gwddf, brech, poenau cyhyrau difrifol, cochni o amgylch clwyf
Mae’n debyg eich bod wedi gweld yr adroddiadau ar y cyfryngau cenedlaethol yr wythnos hon ynglŷn ag Afiechyd Streptococol Grŵp A ymledol (IGAS) – a elwir hefyd yn ‘Strep A.’
Bu nifer o achosion difrifol yn y DU yn cynnwys plant ifanc, ac anogir rhieni ac ysgolion i edrych am symptomau.
Mae Iechyd Cyhoeddus Cymru wedi cyhoeddi’r cyngor canlynol:
- Dylai ysgolion fod yn ymwybodol o’r posibilrwydd o haint mewn plant sy’n mynd yn sâl â thymheredd, dolur gwddf neu frech.
- Cynghorir rhieni plant sy’n sâl i gael cyngor meddygol ar gyfer diagnosis a thriniaeth.
- Dylai unrhyw un sydd â’r dwymyn goch beidio â mynychu’r ysgol am 24 awr ar ôl i’r driniaeth wrthfiotig briodol ddechrau.
- Gall hylendid dwylo da ac osgoi lledaenu diferion anadlol (fel gyda’r ffliw – “ei ddal, ei daflu, ei ddifa”) helpu i atal yr haint rhag lledaenu.
Arwyddion a symptomau o’r dwymyn goch
Weithiau gall Strep A achosi y dwymyn goch.
Mae’n hynod heintus a gellir ei ddal drwy gyswllt uniongyrchol â rhywun sydd wedi’i heintio neu drwy’r aer drwy ddefnynnau o besychiadau neu disian.
Prif symptom y dwymyn goch yw brech binc-goch fân sydd i’w theimlo fel papur llyfnu i’w chyffwrdd.
Mae symptomau eraill yn cynnwys tymheredd uchel, wyneb coch a thafod coch chwyddedig.
Mae’r driniaeth yn syml ac fel arfer yn golygu cwrs o wrthfiotigau penisilin.
Cymhlethdodau’r dwymyn goch a haint streptooccal
Ni fydd y rhan fwyaf o achosion o’r dwymyn goch yn achosi cymhlethdodau, yn enwedig os caiff y cyflwr ei drin yn briodol.
Fodd bynnag, gall cymhlethdodau yng nghyfnod cynnar y clefyd achosi haint yn y glust, casgliad yn y gwddw, sinusitis, niwmonia a llid yr ymennydd.
Mae cymhlethdodau prin iawn yn cynnwys twymyn y gwynegon, niwed i’r arennau, haint yr esgyrn, gwenwyniad gwaed a syndrom sioc tocsig a allai beryglu bywyd.
Mae arwyddion cynnar o haint ymledol yn cynnwys:
- Gwres uchel.
- Poenau cyhyrau difrifol.
- Tynerwch cyhyrau lleol.
- Cochni ger clwyf.
Os oes gennych unrhyw bryderon am haint ymledol, yna rhaid ceisio cyngor meddygol ar frys.
Y cyngor i rieni yw:
- Cysylltwch â’ch meddyg teulu, ewch i 111.wales.nhs.uk, neu ffoniwch GIG 111 Cymru.
- Sicrhewch fod eich plentyn yn cymryd y cwrs llawn o unrhyw wrthfiotigau a roddir gan y meddyg.
- Cadwch eich plentyn gartref, i ffwrdd o’r feithrinfa, ysgol neu waith a dilyn unrhyw ganllawiau a roddwyd gan eich meddyg teulu ar ba mor hir y dylent aros i ffwrdd o’r lleoliadau hyn.
- Mae gwybodaeth a chyngor diweddaraf ar heintiau streptococcal A ar 111.wales.nhs.uk
Rhagfyr 7, 2022
Yn rhentu eich cartref? Fe allai Tystysgrif Perfformiad Ynni (TPY) â sgôr da helpu i gadw eich biliau ynni i lawr
Os ydych chi’n rhentu eich cartref – neu’n ystyried rhentu – gofynnwch i’r landlord ddangos y Dystysgrif Perfformiad Ynni (TPY) ar gyfer yr eiddo i chi.
Bydd TPY yn dweud wrthych pa mor effeithlon yw’r adeilad o ran ynni, a gallai rhoi syniad i chi o beth fydd y costau gwresogi.
Yn ôl y gyfraith, mae’r mwyafrif o eiddo yng Nghymru angen TPY cyn iddynt gael eu rhentu.
Yr unig eithriadau yw fflatiau un ystafell neu osod ystafell a rhannu cegin, toiled neu ystafell ymolchi, ac ystafelloedd mewn neuaddau preswyl neu hosteli.
Mae sgoriau TPY yn amrywio o ‘A’ i ‘G’ – ‘A’ yw’r sgôr gorau, a ‘G’ yw’r gwaethaf.
Ydych chi’n ddioddefwr siarc benthyg arian? Ffoniwch 0300 123 311.
Allech chi ymgeisio am grant?
Y Cynghorydd David A Bithell yw Aelod Arweiniol Tai Cyngor Wrecsam, ac mae’n gadeirydd gweithgor trawsbleidiol a sefydlwyd i gefnogi pobl drwy’r argyfwng costau byw.
Dywedodd:
“Os ydych chi’n rhentu neu’n ystyried rhentu, mae hi werth gofyn i’r landlord am gopi o’r TPY.
“Mae costau ynni sy’n codi yn ei gwneud hi’n fwy drud i gynhesu cartref, ond gallai byw mewn eiddo sydd yn effeithlon o ran ynni helpu i gadw eich biliau tanwydd i lawr.
“Oni bai bod eiddo wedi’i eithrio, fe ddylai eiddo sy’n cael ei rentu fod â sgôr o leiaf ‘E’. Os yw’r sgôr yn is, fe allai eich landlord fod yn torri’r gyfraith.
“Fel tenant, efallai y bydd modd i chi wella’r adeilad drwy ymgeisio am grant effeithlonrwydd ynni, neu drwy annog eich landlord i ymgeisio.
“Gofynnwch am sgwrs i weld os allwch chi gydweithio.”
Gallwch ddysgu mwy am Dystysgrifau Perfformiad Ynni a grantiau effeithlonrwydd ynni ar wefan Cyngor Wrecsam.
O ran costau byw, gallai gwneud yn siwr eich bod yn hawlio yr holl gymorth a chefnogaeth y mae gennych hawl iddo wneud gwahaniaeth mawr.

[button color=”” size=”large” type=”square_outlined” target=”new” link=”https://www.wrecsam.gov.uk/services/cymorth-gyda-chostau-byw”] HAWLIWCH YR HYN SY’N DDYLEDUS I CHI [/button]
Tachwedd 30, 2022
Cadw’n gynnes tra’r ydych yn aros yn Shopmobility Wrecsam!
Erthygl gwestai o Gymdeithas Mudiadau Gwirfoddol Wrecsam
O’r 28 Tachwedd, gall aelodau o’r cyhoedd alw i mewn i Shopmobility Wrecsam i gynhesu, i gael diod gynnes a siarad gyda staff cyfeillgar o Gymdeithas Mudiadau Gwirfoddol Wrecsam os hoffent sgwrs neu gwmni – wrth aros am eu cludiant neu lochesu o dywydd y gaeaf.
Mae te a choffi am ddim ar gael o’r peiriant hunanwasanaethu, a darperir bisgedi ar sail y cyntaf i’r felin. Bydd y gwasanaeth hwn ar gael yn ystod amseroedd agor arferol Shopmobility, ar ddydd Llun a dydd Iau rhwng 10am a 4pm.
Dywedodd Dawn Roberts-McCabe, Prif Swyddog Cymdeithas Mudiadau Gwirfoddol Wrecsam: “Os oes unrhyw un eisiau man cynnes a diogel yn y gaeaf, mae croeso iddynt yn Shopmobility Wrecsam i fwynhau diod gynnes a chael cwmni cyfeillgar, ac i lochesu rhag oerni’r gaeaf tra eu bod yn aros am eu cludiant gartref – galwch heibio!”
Os yw’r cyhoedd yn dymuno rhannu pam eu bod eisiau man cynnes, bydd staff Cymdeithas Mudiadau Gwirfoddol Wrecsam yn barod i wrando ac yn atgyfeirio lle bo’n bosibl.
Os bydd aelodau’r cyhoedd angen cymorth neu gefnogaeth ychwanegol gyda chostau byw, bydd staff AVOW yn eu helpu i gysylltu â sefydliadau a all ddarparu cefnogaeth.
Tachwedd 22, 2022
Cymorth gyda chostau byw – dewch o hyd i’r hyn y mae gennych hawl iddo
O ran costau byw, gallai gwneud yn siŵr eich bod yn hawlio’r holl gymorth a chefnogaeth y mae gennych hawl iddo wneud gwahaniaeth mawr.
Mae grantiau a budd-daliadau amrywiol a allai eich helpu â phethau fel cynhesu eich cartref, anfon eich plant i’r ysgol a thalu eich rhent.
Gallwch hefyd gael cyngor ar sut i leihau eich biliau tŷ, a gofalu am eich iechyd os ydych yn poeni am arian.
Yn ddiweddar, bu i Gyngor Wrecsam sefydlu gweithgor trawsbleidiol arbennig i roi cymaint â phosibl o gymorth i gymunedau lleol, ac mae’n annog pobl i fanteisio ar y cymorth sydd ar gael.
Hawliwch yr hyn y mae gennych hawl iddo
Gallwch ddod o hyd i wybodaeth ddefnyddiol ar wefan y cyngor ar www.wrecsam.gov.uk
Mae’n cynnwys gwybodaeth am fudd-daliadau a grantiau, argymhellion ar sut i leihau eich biliau tŷ, ymdopi â phryderon ariannol a materion cysylltiedig eraill.
Gallwch hefyd ffonio Canolfan Cyngor ar Bopeth am gyngor cyffredinol a thalebau banciau bwyd ar 0300 330 1178 (dydd Llun, Mercher a Gwener 9.30am-2pm).
Cymorth gyda chostau byw – hawliwch yr hyn sy’n ddyledus i chi, lleihewch eich biliau, gofalwch am eich iechyd.
Sesiynau galw heibio i gael gwybodaeth
Mae sesiynau galw heibio i gael cyngor, lle gallwch siarad â rhywun wyneb yn wyneb, hefyd yn cael eu cynnal mewn llyfrgelloedd ar draws y fwrdeistref sirol.
- Dydd Gwener, 18 Tachwedd 2022 – Llyfrgell y Waun, 10am – 2pm
- Dydd Gwener, 2 Rhagfyr 2022 – Llyfrgell Coedpoeth, 2pm – 5pm
- Dydd Gwener, 16 Rhagfyr 2022 – Llyfrgell Rhos, 11am – 3pm
- Dydd Gwener, 6 Ionawr 2023 – Llyfrgell Gwersyllt, 2pm – 5pm
- Dydd Gwener, 20 Ionawr 2023 – Llyfrgell Rhiwabon, 2pm – 5pm
- Dydd Gwener, 3 Chwefror 2023 – Llyfrgell Llai, 2pm – 5pm
- Dydd Gwener, 17 Chwefror 2023 – Llyfrgell Wrecsam, 10am – 2pm
Dewch draw i gael gwybod mwy am y cymorth sydd ar gael.
Ac os ydych chi’n denant tŷ Cyngor, gallwch fynd i un o’r digwyddiadau canlynol i gael cyngor ar arbed ynni, lleihau biliau, cyngor ar ddyledion a chymorth ariannol:
- Dydd Gwener, 18 Tachwedd – Canolfan Adnoddau Gwersyllt, 10am-1pm
- Dydd Llun, 21 Tachwedd – Canolfan Gymunedol Johnstown, 1pm-4pm
- Dydd Iau, 24 Tachwedd – Canolfan Hamdden Plas Madoc, 1pm-3pm
Cadwch yn gynnes
Gyda biliau tanwydd yn codi, mae llawer o bobl yn poeni am wresogi eu cartrefi’r gaeaf hwn.
Oeddech chi’n gwybod bod yr holl lyfrgelloedd cyhoeddus ym Mwrdeistref Sirol Wrecsam wedi agor eu drysau i ddarparu ‘Llochesau Cynnes’?
Mae’r rhain yn llefydd y gallwch fynd iddynt i gadw’n gynnes ac yn gyfforddus yn ystod y dydd.
Mae’r llyfrgelloedd sy’n cymryd rhan yn cynnwys Brynteg, Cefn Mawr, y Waun, Coedpoeth, Gwersyllt, Llai, Owrtyn, Rhos, Rhiwabon a Wrecsam.
Cymorth ymarferol i gymunedau
Dywedodd y Cynghorydd David A Bithell, sy’n cadeirio’r grŵp: “Mae’r argyfwng costau byw yn her anferth ac mae’n mynd i fod yn aeaf anodd i lawer o bobl.
“Dyna pam mae’r holl bleidiau gwleidyddol ar y Cyngor yn gweithio gyda’i gilydd i geisio darparu cymaint o gymorth ymarferol â phosibl i’n cymunedau.
“Dyna pam rydym yn darparu cymorth ychwanegol i Fanc Bwyd Wrecsam, Canolfan Cyngor ar Bopeth ac asiantaethau lleol eraill hefyd.
“Os nad ydych wedi gwneud eisoes, gwnewch yn siŵr eich bod yn gwybod pa gefnogaeth y mae gennych hawl iddo. Ewch ar wefan y Cyngor am wybodaeth, neu ewch i un o’n digwyddiadau galw heibio i gael cymorth a chyngor.”
O ran costau byw, gallai gwneud yn siwr eich bod yn hawlio yr holl gymorth a chefnogaeth y mae gennych hawl iddo wneud gwahaniaeth mawr.

[button color=”” size=”large” type=”square_outlined” target=”new” link=”https://www.wrecsam.gov.uk/services/cymorth-gyda-chostau-byw”] HAWLIWCH YR HYN SY’N DDYLEDUS I CHI [/button]
Grantiau Lleoedd Cynnes – mynegiant o ddiddordeb
Tachwedd 18, 2022
Dweud eich dweud am gynlluniau i wella llwybrau cerdded a beicio yn Wrecsam
Mae gofyn i bobl Wrecsam roi eu barn am gynlluniau i wella llwybrau cerdded a beicio ar hyd pedair prif ffordd.
Mae Cyngor Wrecsam a Thrafnidiaeth Cymru’n cydweithio i’w gwneud yn haws, yn fwy diogel ac yn fwy cyfleus cerdded a beicio yn y ddinas, ac rydym eisiau eich adborth ar gynlluniau i wella:
- Yr A525 ar hyd Ffordd Melin y Brenin, Ffordd Sir Amwythig a Rhodfa San Silyn.
- Yr A534 ar hyd Ffordd Holt a Ffordd Borras.
- Yr A5152 ar hyd Ffordd Caer.
- Yr A541 ar hyd Ffordd yr Wyddgrug a Stryt y Rhaglaw.
I roi eich barn, cymerwch ran yn ein hymgynghoriad ar-lein lle gallwch weld darluniau a lluniau o’r gwelliannau sydd ar y gweill.
Neu galwch draw i’n sesiwn alw heibio yn Tŷ Pawb, Stryt y Farchnad, Wrecsam, LL13 8BY ddydd Mercher, 9 Tachwedd rhwng 4pm a 7pm.
Cymorth gyda chostau byw – hawliwch yr hyn sy’n ddyledus i chi, lleihewch eich biliau, gofalwch am eich iechyd.
Argyfwng yr hinsawdd
Mae’r Dirprwy Arweinydd, y Cynghorydd David Bithell, sy’n arwain ar gludiant strategol a theithio llesol, yn dweud: “Drwy ddarparu gwell llwybrau cerdded, traciau beicio a chroesfannau, a datblygu rhwydwaith o lwybrau ar hyd Wrecsam, gallwn wneud cerdded a beicio’n fwy diogel a chyfleus.
“Rydym ni eisiau annog mwy o bobl i adael eu car gartref ar deithiau lleol, byr, ac wrth i’r byd wynebu argyfwng hinsawdd ac ecolegol, mae hyn yn bwysicach nag erioed.
“Felly llenwch ein holiadur ar-lein neu dewch draw i’n sesiwn galw heibio yn Tŷ Pawb ar 9 Tachwedd.”
Mae angen JavaScript ar y sioe sleidiau hon.
Cysylltu cymunedau
Mae’r Cynghorydd Hugh Jones, yr aelod arweiniol sy’n gyfrifol am briffyrdd, yn dweud: “Mae’r llwybrau rydyn ni eisiau eu darparu’n gysylltiadau pwysig rhwng cymunedau, ysgolion, siopau, llefydd gwaith a chanol y dinas.
“Rydyn ni wedi ystyried sut y gallai pob llwybr gael ei ailddylunio i greu llwybrau uniongyrchol, diogel, cyfforddus a deniadol i gerddwyr, yn cynnwys pobl sy’n defnyddio cadeiriau olwyn a sgwteri symudedd, yn ogystal â beicwyr.
“Mae hwn yn brosiect cyffrous i Wrecsam, felly sbariwch ychydig o amser i edrych ar y cynigion a chynnig eich barn arnynt.”
Mae’r ymgynghoriad ar agor tan 21 Tachwedd.
[button color=”” size=”large” type=”square_outlined” target=”new” link=”https://wrexhamtransformingtowns.commonplace.is/cy-GB”]LLEISIWCH EICH BARN[/button]
Tachwedd 1, 2022
Cefnogwch Apêl y Pabi yn y gêm ddydd Sadwrn
Bydd cefnogwyr yng ngêm Wrecsam y penwythnos hwn yn cael eu hannog i roi eu dwylo yn eu pocedi a chefnogi Apêl y Pabi eleni.
Bydd Clwb Pêl-droed Wrecsam yn wynebu Altrincham ddydd Sadwrn, a bydd gwirfoddolwyr wrth ochr y cae ac yn y standiau yn casglu er budd yr achos hwn.
Mae Apêl y Pabi wedi’i threfnu gan y Lleng Brydeinig Frenhinol, ac fe’i sefydlwyd ym 1921, yn fuan wedi’r Rhyfel Byd Cyntaf.
Mae gwisgo pabi yn dangos cefnogaeth i’n lluoedd arfog, a defnyddir yr arian a gaiff ei godi i helpu dynion a merched sy’n gwasanaethu, cyn-filwyr a’u teuluoedd.
Bydd Cefnogwr y Lluoedd Arfog Cyngor Wrecsam, y Cynghorydd Beverley Parry-Jones, yn ymuno â’r gwirfoddolwyr yn y gêm, ac mae’n edrych ymlaen at weld pobl yn cefnogi’r tîm pêl-droed a’r apêl.
Cymorth gyda chostau byw – hawliwch yr hyn sy’n ddyledus i chi, lleihewch eich biliau, gofalwch am eich iechyd.
Dywedodd y Cynghorydd Parry-Jones:
“Mae Wrecsam yn hynod o falch o’i gysylltiadau â’r lluoedd arfog, ac mae nifer o ddynion a merched o bob rhan o’r fwrdeistref sirol wedi gwasanaethu a gwneud aberthau hynod dros y blynyddoedd.
“Mae Apêl y Pabi yn fenter hyfryd sy’n darparu help hanfodol i staff y gwasanaethau arfog a’u teuluoedd – yn aml pan fyddant ei angen fwyaf.
“Felly os byddwch chi yn y gêm ddydd Sadwrn a’n gweld ni’n casglu, cofiwch gyfrannu a gwisgo eich pabi gyda balchder.
“Byddwch chi’n gwneud rhywbeth gwerth chweil, a helpu Wrecsam fel cymuned i ddweud ‘diolch’ wrth y dynion a’r merched dewr sydd wedi rhoi gymaint i’n gwlad.”
Bydd yr ymgyrch genedlaethol yn lansio’n swyddogol ddydd Sul (30 Hydref), felly beth am brynu pabi a dangos eich cefnogaeth.
Caiff y lansiad ei nodi gan Feicwyr y Lleng Brydeinig Frenhinol a gwasanaeth byr ar Lwyn Isaf yn Wrecsam am 9.15am.
O ran costau byw, gallai gwneud yn siwr eich bod yn hawlio yr holl gymorth a chefnogaeth y mae gennych hawl iddo wneud gwahaniaeth mawr.

[button color=”” size=”large” type=”square_outlined” target=”new” link=”https://www.wrecsam.gov.uk/services/cymorth-gyda-chostau-byw”] HAWLIWCH YR HYN SY’N DDYLEDUS I CHI [/button]
Hydref 27, 2022
Grŵp costau byw yn dechrau gweithio ar helpu preswylwyr Wrecsam
Mae tasglu arbennig a sefydlwyd i helpu i roi cymaint â phosibl o gymorth i breswylwyr Wrecsam yn ystod yr argyfwng costau byw wedi cyfarfod am y tro cyntaf.
Yn gynharach y mis hwn, cyhoeddodd Cyngor Wrecsam y byddai’n sefydlu gweithgor hollbleidiol i ystyried yr heriau sy’n wynebu cymunedau lleol, ac i ganfod ffyrdd ymarferol o helpu pobl leol.
Gwnaeth y grŵp gyfarfod am y tro cyntaf ddydd Iau, 13 Hydref a gwnaethon nhw nodi nifer o gamau pwysig, yn cynnwys:
- Gweithio’n agos â Banc bwyd Wrecsam i ymchwilio i ffyrdd newydd o helpu i sicrhau nad oes unrhyw un yn mynd heb fwyd.
- Cysylltu â thenantiaid tai cyngor diamddiffyn i sicrhau eu bod nhw’n iawn.
- Edrych ar ffyrdd o ehangu’r cynllun ‘lleoedd cynnes’ – fel bod mwy o leoedd y gall pobl fynd iddyn nhw i gadw’n gynnes os ydyn nhw’n ei chael yn anodd cynhesu eu tai.
- Cyfeirio pobl at wybodaeth, fel eu bod nhw’n gallu hawlio’r hyn y mae ganddyn nhw hawl iddo a manteisio ar y cymorth sydd ar gael. Mae camau’n cynnwys:
  – Rhoi gwybodaeth ar wefan y cyngor am fudd-daliadau a grantiau, awgrymiadau ar gyfer lleihau biliau’r cartref, ymdopi â phryderon am arian ac ati.
  – Sicrhau bod staff y cyngor (yn enwedig gweithwyr y rheng flaen) yn gwybod ble i gyfeirio pobl i gael cymorth.
  – Cynnal digwyddiadau gwybodaeth ar draws y fwrdeistref sirol.
  – Defnyddio cylchgrawn Trafodion Tai y cyngor i sicrhau bod tenantiaid y cyngor yn gwybod ble i gael cymorth.
Mae’r grŵp – a fydd yn cyfarfod unwaith bob pythefnos i ddechrau – yn cynnwys cynghorwyr o bob grŵp gwleidyddol yng Nghyngor Wrecsam, yn ogystal â swyddogion.
Dywedodd y Cynghorydd David A Bithell, sy’n cadeirio’r grŵp:
“Mae’n braf iawn gweld y grwpiau gwleidyddol i gyd yn dod at ei gilydd i weithio ar y mater hwn, a gwnaethom ni nodi camau pendant yn ystod ein cyfarfod cyntaf.
“Mae’r argyfwng costau byw yn fater cenedlaethol, ac er nad ydym ni’n gallu ei ddatrys, mae pethau y gallwn ni eu gwneud fel cyngor lleol i helpu ein cymunedau.
“Mae pawb yn y grŵp wedi ymrwymo’n llwyr i gydweithio i wneud yr hyn a allwn, oherwydd rydym ni i gyd yn cydnabod bod angen cymorth ymarferol ar bobl ar hyn o bryd.
“Drwy sicrhau bod pobl yn gwybod pa gymorth sydd ar gael, a’u helpu nhw i roi bwyd ar y bwrdd a chadw’n gynnes, gobeithio y gallwn ni wneud gwahaniaeth.”
Hydref 18, 2022